O‘zR FA San’atshunoslik instituti olimlari — professor Akbar Hakimov, katta ilmiy xodim Masharib Abdullayev muallifligida “Markaziy Osiyo torevtikasi: Ahamoniylardan Shayboniylargacha” nomli yangi monografiya nashr etildi.
Ushbu nashr Markaziy Osiyoning madaniy va badiiy merosiga oid yangi materiallar — artefaktlar tahliliga asoslangan. Mazkur artefaktlar O‘zbekiston tomonidan Londondagi auksion uylari va shaxsiy galereyalaridan O‘zbekistondagi Islom sivilizatsiyasi markazining ko‘rgazmasi hamda kolleksiyalari uchun sotib olingan. Olingan artefaktlarning aksariyati torevtika edi.
Asosiy g‘oya — qadimgi davrlardan o‘zbek xonliklari davrigacha Markaziy Osiyoda oltin, kumush va mis buyumlarning shakllar evolyutsiyasini, motivlarning semantikasini va uslub evolyutsiyasini o‘rganish.
Eslatib o'tamiz, Londondagi Sotheby‘s va Christie‘s auksion uylarida, shaxsiy kolleksiyalarda saqlanib kelgan O‘zbekiston tarixiga oid noyob artefaktlar va Qurʼon qo‘lyozmalari Vatanga qaytarildi. Eksponatlar Yangi O‘zbekistonning madaniy-tarixiy merosni asrash, o‘rganish va targ‘ib qilish yo‘lidagi navbatdagi yutuqlarini amalda isbotladi.