Xalqaro ilmiy kongress O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyatini tashkil etish to‘g‘risida qaror qabul qildi, Gazeta.uz xabar bermoqda.
“O‘zbekiston madaniy merosi – xalqlar va mamlakatlar o‘rtasidagi muloqotga yo‘l” xalqaro ilmiy kongressi yakunlari bo‘yicha O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyatini tashkil etish zarurligi to‘g‘risidagi qaror qabul qilindi.
Butun dunyodan sharqshunoslar, arxeologlar, tarixchilar, sanʼatshunoslar, kolleksionerlar, ommaviy axborot vositalari vakillari bu jamiyatga aʼzo bo‘lishlari mumkin. Jamiyat O‘zbekiston madaniy merosi yodgorliklari kolleksiyalarini saqlaydigan muzeylar va ilmiy markazlarda xalqaro tadbirlar – ko‘rgazmalar, taqdimotlar va madaniy forumlarni o‘tkazishi mumkin bo‘ladi.
Qarorda tadqiqotchilarga madaniy meros obyektlaridan foydalanish imkoniyatini taʼminlash zarurligiga ham ishora qilingan. “Muzey ashyolari va raqamli kataloglar to‘g‘risida to‘liq maʼlumotlarning yo‘qligi O‘zbekiston madaniy merosini yana-da kengroq o‘rganish va targ‘ib qilishga to‘sqinlik qilmoqda”, – deya tushuntiradi kongress ishtirokchilari qarorda.
Xalqaro ilmiy kongress 15-16 may kunlari Toshkent va Samarqand shaharlarida bo‘lib o‘tdi. Unda 40 dan ortiq davlatdan 140 dan ortiq olimlar, ekspertlar, diplomatlar, xalqaro tashkilotlar vakillari, shuningdek, mamlakatimizning 50 dan ortiq ilm-fan namoyandalari ishtirok etdi. Yakuniy yig‘ilishda kongressni har yili o‘tkazishga qaror qilindi.
