Sankt-Peterburgda boʻlib oʻtayotgan “Oʻzbekiston madaniy merosi – xalqlar va mamlakatlar oʻrtasidagi muloqotga yoʻl” xalqaro kongressi doirasida “Oʻzbekiston madaniy merosi jahon toʻplamlarida” turkumidagi navbatdagi besh jildlik kitob-albomlari taqdimoti bo'lib o'tadi.
“Dinlar tarixi davlat muzeyi kolleksiyasi” kitob-albomida Din tarixi davlat muzeyi (Sankt-Peterburg) kolleksiyasidan O‘zbekistonning ma’naviy va moddiy madaniyatiga oid ashyolar taqdim etilgan.
“O‘zbekiston madaniy merosi” loyihasi doirasida ushbu to‘plam birinchi marta maxsus tadqiqot mavzusiga aylandi. Unda turli diniy e'tiqod va kultlarni aks ettiruvchi san'at asarlari taqdim etilgan: zardushtiylik, buddizm, iudaizm, islom. To‘plam II asrdan XX asrgacha bo‘lgan davrni qamrab olgan bo‘lib, arxeologik va etnografik ashyolar, shuningdek, tasviriy va dekorativ san’at asarlarini o‘z ichiga oladi.
Nashr nafaqat ilmiy-tadqiqot jamoatchiligi vakillari, balki mamlakatimiz va xorijiy keng auditoriya, O‘zbekistonning boy madaniy merosiga qiziquvchi yosh avlod vakillari uchun ham mo‘ljallangan. Ta’kidlash joizki, jahonda o‘xshashi bo‘lmagan loyihaning o‘zi ham O‘zbekiston Respublikasi Prezidenti Shavkat Mirziyoyevning tarixiy, madaniy merosimizni va o'zbek xalqining intellektual merosini asrab-avaylash, boyitish va takomillashtirish masalalariga shaxsan e’tibori tufayli amalga oshirilmoqda.
Albom o‘quvchilari kitob-albomga biriktirilgan maxsus hujjatli film va uning diski orqali O‘zbekistonning boy madaniyati va san’ati haqidagi tushunchalarini kengaytiradilar.
“O‘zbekiston madaniy merosi jahon to‘plamlarida” ko‘p jildli turkumida O‘zbekiston tarixiy-madaniy merosining noyob namunalariga bag‘ishlangan boshqa kitob-albomlarni nashr etish ko‘zda tutilgan.
